ఆలయాన వెలసిన ఆ దేవుని రీతి ఇల్లాలే ఈ జగతికి జీవన జ్యోతి అని ఒక సినీ కవి చెప్పాడు. అది అక్షరాలా నిజం. ఇల్లాలు తన జీవితపు ప్రమిద లో విజ్ఞానపు నూనె వేసి చిట్కాల వత్తులను వెలిగిస్తే ఇళ్ళంతా దీపావళి సంబరమే. నిత్యం వెలుగుల పండగే. అలాంటి దీపాల వెలుగులను మరువ లేని అనుభూతిగా అందుకోవాలంటే ముందు మూడు ఆణిముత్యాల గురించి తెలుసుకోవాలి. అదే...అందం...ఆనందం...ఆరోగ్యం. ఈ మూడు మన దగ్గర ఉంటే చాలు. అయితే ఇది శరీరానికా, మనసుకా, ఇంటికా అన్నది ప్రశ్న. ఇంకెందుకు ఆలస్యం ...సమాధానం వెతికేద్దాం పదండి...
ఇంటిని ఇల్లాలిని ఒకే సారి చూద్దాం
ఇంటిని చూసి ఇల్లాలిని చూడమన్నది ఆనాటి మాట. ఇంటిని ఇల్లాలిని ఒకేసారి చూడమన్నది ఈనాటి మాట. ఎందుకంటే ఇల్లు , ఇల్లాలు రెండూ ఒక దానితో ఒకటి పోటీ పడుతుంటాయి మరి! అందులో ఎవరు నెగ్గాలి? ఎవరు నెగ్గినా ఇద్దరు గెలిచినట్టే!
పొదరిల్లు లాంటి ఇల్లు... అది చిన్నదైనా, పెద్దదైనా, గుడిసె అయినా, బంగారపు ఇల్లు అయినా ఇల్లు ఇల్లే ! ఇల్లాలే ఆ గృహ సామ్రాజ్యానికి మహా రాణి. అలాంటి ఇంటిని ఎలా సర్డుకుంటే మంచి అందం వస్తుంది అని తెలుసుకుంటే పని సులభం అయిపోతుంది.
మనుషుల్లో బీద గొప్ప లాగ, ధనార్జన లో ఎక్కువ తక్కువ లాగ ఇంటి సదుపాయాల్లో కుడా తేడాలు ఉంటాయి. అందరికీ లివింగ్ రూమ్, డైనింగ్ రూమ్, డ్రాయింగ్ రూమ్, గెస్ట్ రూమ్ లు ఉండకపోవచ్చు. అన్ని కలిపి ఒక్క 'హాల్' అవ్వొచ్చు. ఇంకా చెప్పాలి అంటే హాల్ కమ్ డైనింగ్ కూడా అవ్వొచ్చు. ఇప్పుడు ఎక్కడ చూసినా ఇలాగే కదా ఉంటున్నాయి ! కాబట్టి ఎన్ని రూమ్స్ అన్నది కాదు ఎంత కళాత్మకంగా ఉంచుకున్నామన్నది ప్రశ్న.
ఎన్ని వేలు ఖర్చు చేశామన్నది కాదు ఎంత అందంగా సర్దుకున్నాం, ఎంత ఆనందాన్ని మన కళ్ళలో నింపుకున్నాం అన్నదే ముఖ్యం. ఈరోజున బజారులో ఒక వస్తువు అయిదు రూపాయలు నుంచి యాభై వేల రూపాయల వరకు దొరుకుతుంది. కాబట్టి ఎంత ఖర్చు పెట్టామన్నది కాకుండా ఎంత తక్కువ ఖర్చులో ఎంత ఎక్కువ అందాన్ని తీసుకు రాగాలమో చూసుకోవాలి. ధనవంతులైతే ఇంటీరియర్ డెకరేటర్స్ ని పిలిచి ఇంటిని తీర్చిదిద్దుకుంటారు. కాని మధ్య తరగతి మహిళ ఉన్నంతలో పొడుపును పాటిస్తూ వీలైనంత వరకు తక్కువ ఖర్చు చేస్తూ అవకాసం ఉన్నంత వరకూ అందంగా ఇంటిని తీర్చిదిద్దుకోవచ్చు. అదెలానో చూద్దాం...
No comments:
Post a Comment